ایرانی ایئر فورس کے کمانڈر کی جنرل قمر جاوید باجوہ سے ملاقات

راولپنڈی : ایرانی ایئر فورس کے کمانڈر بریگیڈئیر جنرل پائلٹ حامد وحیدی نے آرمی چیف جنرل قمر جاوید باجوہ سے جی ایچ کیو میں ملاقات کی ، ملاقات کے دوران باہمی دلچسپی کے امور، علاقائی سیکیورٹی صورتحال اور دو طرفہ تعاون پر اہم بات چیت کی،جنرل قمر جاوید باجوہ نے کہا کہ پاکستان اپنے پڑوسیوں کیساتھ پرامن اور قریبی تعلقات چاہتا ہے، علاقائی سلامتی کیلئے مشترکہ کوششوں کی ضرورت ہے ۔ دونوں ملکوں کے کمانڈروں نے دفاع اور سیکیورٹی کے شعبوں میں تعاون کو فروغ دینے پر اتفاق کیا، ایران کی ایئر فورس کے کمانڈر نے پاکستان کی مسلح افواج کی پیشہ وارانہ مہارت کی تعریف کی اور مختلف شعبوں میں تعاون کو فروغ دینے کی ضرورت کا اعادہ کیا ، انہوں نے پاکستان کے افغانستان کی صورتحال کے بارے میں کردار کی تعریف کی اور موثر باڈر منیجمنٹ کے اقدامات کو بھی سراہا۔