قرآن کی مبینہ بے حرمتی، خانیوال میں ایک شخص ہجوم کی بھینٹ چڑھ گیا

خانیوال : پنجاب میں ایک اور شخص ہجوم کی بھینٹ چڑھ گیا، خانیوال کے علاقے تلمبہ میں قرآن کے اوراق کی بےحرمتی کی خبر پھیلی تو لوگ جمع ہوگئے اور مشتاق احمد نامی شخص کو بدترین تشدد کرکے قتل کردیا۔ ظالموں نے نہ صرف قتل کیا بلکہ اس کی لاش کی بے حرمتی بھی کی۔ مقتول بارہ اے ایچ کا رہائشی اور ذہنی معذور تھا۔ وزیراعلی اور آئی جی پنجاب کے نوٹس کے بعد 33 نامزد اور 300 نامعلوم افراد کے خلاف مقدمہ درج کرلیا گیا- پولیس نے 62 مشتبہ افراد کو حراست میں لےلیا ہے جس میں بعض مرکزی ملزمان بھی شامل ہیں۔آئی جی راؤ سردار علی خان نے وزیراعلیٰ عثمان بزدار کو ابتدائی رپورٹ پیش کردی۔رپورٹ کے مطابق فوٹیجز کی مدد سے ملزمان کی شناخت اور کردار کا تعین کیا جائے گا۔ وزیر اعلیٰ عثمان بزدار نے ہدایت کی کہ انصاف کے تمام تقاضے پورے کئے جائیں۔