نصاب میں متنازعہ مواد کسی صورت قبول نہیں کریں گے، مجلس وحدت مسلمین

لاہور: نصاب تعلیم میں متنازعہ مواد کے حوالے سے مجلس وحدت مسلمین پنجاب کا اجلاس ہوا۔ اجلاس کی صدارت صوبائی سیکریٹری تعلیم سید نجیب الحسن نقوی نے کی۔ اجلاس میں ڈاکٹر سید دانش نقوی، سید نثار علی ترمذی، ثقلین حیدر، رانا کاظم، سید فیضان نقوی، زین العابدین اور مولانا ظہیر کربلائی سمیت دیگر رہنماؤں نے شرکت کی۔اجلاس میں سید نجیب الحسن نے شرکاء کو متنازعہ نصاب کے تدارک کے حوالے سے کئے گئے اقدامات اور اب تک ہونے والی پیشرفت سے آگاہ کیا۔اس موقع پر شرکائے اجلاس نے اپنی آراء اور تجاویز بھی پیش کیں۔ سید نجیب الحسن نقوی کا کہنا تھا کہ نصاب میں متنازعہ مواد کسی طور بھی قبول نہیں کریں گے، ایک خاص گروہ دیگر مکاتب فکر پر اپنی سوچ اور نظریات زبردستی ٹھونسنا چاہتا ہے، جسے کسی طور قبول نہیں کیا جائے گا۔ انہوں نے کہا کہ نصاب ایسا ہونا چاہیئے کہ تمام مکاتب فکر کیلئے قابل قبول ہو، ایسا نصاب نہیں کہ جس میں متنازع شخصیات کو معتبر بنا کر نسل نوء کی فکر کو تبدیل کیا جائے۔