شام سے امریکی پابندیوں کا خاتمہ اقلیتوں کے تحفظ سے مشروط

واشنگٹن : امریکی قانون سازوں نے شام پر پابندیاں اٹھانے کے اقدام کو اقلیتوں کے تحفظ سے مشروط کر دیا ہے۔ امریکا کے ایک سو چونتیس قانون سازوں نے دو ہزار چھبیس کے نیشنل ڈیفنس آتھرائزیشن ایکٹ کے تحت شام پر پابندیاں اٹھانے سے متعلق پالیسی دستاویز پر دستخط کر دیے ہیں۔
دستاویز کے مطابق پابندیوں میں نرمی صرف اسی صورت ممکن ہوگی جب شام میں مذہبی اور نسلی اقلیتوں کے حقوق کا مکمل تحفظ یقینی بنایا جائے۔ پالیسی دستاویز کے مطابق شرائط کی خلاف ورزی کی صورت میں پابندیاں خود بخود بحال ہو جائیں گی۔ قانون سازوں کا کہنا ہے کہ یہ اقدام صدر ڈونلڈ ٹرمپ کی انتظامیہ اور ایوانِ نمائندگان کی قیادت کے ساتھ مشاورت کے بعد کیا گیا۔ ان کے مطابق اس کا مقصد شام میں امن و استحکام کے امکانات کو فروغ دینا ہے، بشرطیکہ مسیحیوں، دروز، علویوں، کردوں اور دیگر اقلیتوں کے خلاف مظالم کا خاتمہ ہو۔