کرد جنگجو ہتھیار ڈال دیں ورنہ انہیں شام میں دفن کردینگے، اردوان کی دھمکی

انقرہ : شام میں بشار الاسد کی حکومت گرانے کے مرکزی کردار ترک صدر رجب طیب اردوان نے شام میں کرد جنگجوؤں کو خطرناک نتائج کی دھمکیاں دینا شروع کردی ہیں۔ اردوان نے خبردار کیا ہے کہ اگر کرد جنگجوؤں نے ہتھیار نہ ڈالے تو انہیں شامی سرزمین میں دفن کر دیا جائے گا۔ اردوان نے شام کی سلامتی کے لیے خطرہ بننے والے عناصر کو خبردار کیا ہے اور شامی حکومت پر زور دیا ہے کہ وہ کرد ملیشیا کو ختم کر دے کیونکہ کرد جنگجوؤں کی شام کے مستقبل میں کوئی جگہ نہیں ہے۔ انہوں نے کہا کہ علیحدگی پسند قاتل یا تو اپنے ہتھیاروں کو الوداع کر دیں گے یا انہیں اپنے ہتھیاروں کے ساتھ شام کی سرزمین میں دفن کر دیا جائے گا۔ ترک صدر نے مزید کہا کہ ہم اس دہشت گرد تنظیم کو ختم کر دیں گے جو ہمارے اور ہمارے کرد بہن بھائیوں کے درمیان خون کی دیوار بنانے کی کوشش کر رہی ہے۔ ان کا کہنا تھا کہ سیرین ڈیموکریٹک فورسز دہشت گرد تنظیم ہے کیونکہ اس پر وائی پی جے کا غلبہ ہے وائی پی جے کرد دہشت گردوں کیساتھ منسلک ہے۔