پی ٹی آئی چھوڑنے والوں کو ملاکر کنگز پارٹی بنائی جارہی ہے، عمران خان

لاہور: چیئرمین پاکستان تحریک انصاف عمران خان نے کہا ہے کہ پی ٹی آئی چھوڑنے والوں کو ملاکر کنگز پارٹی بنائی جارہی ہے۔ عمران خان نے کہا کہ پارٹی چھوڑ کر جانے والوں میں ایسے بھی ہیں جو نئی پارٹی کیلئے لابنگ کر رہے ہیں۔ کئی لوگ جو پارٹی چھوڑ کرگئے ان کو ہمیں ٹکٹ ہی نہیں دینا تھا۔ ان کا کہنا تھا کہ میں نے پوری کوشش کی ہے کہ نظریاتی لوگوں کو ٹکٹ دیے جائیں، پنجاب میں زیادہ تر لوگ نظریے پر کھڑے ہیں۔ تحریک انصاف پر اس وقت جو ظلم کیا جارہا ہے، اس کی مثال نہیں ملتی، یہ ہمارے ٹکٹ ہولڈرز کے پیچھے پڑے ہوئے ہیں، ہمارے کئی ٹکٹ ہولڈرز نے پارٹی چھوڑ دی ہے۔ چیئرمین پی ٹی آئی کا کہنا تھا کہ ہماری قیادت کے گھر، کاروبار اور فارم ہاؤس توڑے جا رہے ہیں، پارٹی قیادت کی گھر کی خواتین اور بچوں کو دھمکیاں دی جا رہی ہیں، ان کو علم ہے کہ گرفتار ہونے والی کوئی عورت جلاؤ گھیراؤ میں ملوث نہیں۔ ان کا کہنا تھا کہ چیئرمین نیب کی جگہ جسے لائے اس کا کام صرف تحریک انصاف پر کیس کرنا ہے۔ عمران خان نے کہا کہ تحریک انصاف کو توڑنے کیلئے ملک کے اداروں کو تباہ کیا جا رہا ہے۔ انہوں نے مزید کہا کہ ن لیگ کا تو انہیں علم ہے یہ گھوڑا بیٹھنے والا ہے، ان کے جلسوں میں عوام نہیں آتے، ن لیگ اس سارے ظلم کے ساتھ جڑی ہوئی ہے۔