کابل : ماہ رمضان میں ایک اور مسجد نمازیوں کے خون سے لہولہان، 66 نمازی شہید

کابل: افغانستان کی ایک اور مسجد نمازیوں کے خون سے لہولہان ہوگئی دارالحکومت کابل کی ایک مسجد میں زوردار دھماکے سے 66 نمازی شہید اور 70 سےزائدزخمی ہوگئے۔ مسجد خلیفہ آغا گل جان میں اُس وقت دھماکا ہوا جب وہاں نماز جمعہ کی ادائیگی کے بعد بیشتر نمازی محفل ذکر میں شریک تھے۔ دھماکا اتنا زوردار تھا کہ مسجد کے دروازے اور شیشے ٹوٹ گئے جب کہ آس پاس کی عمارتوں کے کھڑکیوں کے شیشے بھی ٹوٹ گئے۔ دھماکے کے بعد بھگدڑ مچ گئی اور ہر طرف آہ و بکا کی آوازیں سنائی دے رہی تھیں۔ ابتدا میں دس نمازیوں کی شہادت کی تصدیق ہوئی تھی۔ ریسکیو ادارے نے امدادی کاموں کے دوران زخمیوں اور لاشوں کو اسپتال منتقل کیا کئی زخمیوں کی حالت نازک ہے۔دھماکے کے بعد طالبان اہلکاروں نے جائے وقوعہ کا محاصرہ کرلیا۔مسجد کے پیش امام فاضل آغا نے بتایا کہ دھماکا خودکش تھا۔