جدہ: سوڈانی فوج اور ریپڈ سپورٹ فورسز کے نمائندوں میں دوبارہ مذاکرات

سوڈان کی فوج اور ریپڈ سپورٹ فورسز کے نمائندوں نے ایک بار پھر سر جوڑ لئے۔ سعودی عرب کی میزبانی میں جدہ میں سوڈان کی متحارب فورسز کے درمیان مذاکرات کا سلسلہ جاری ہے۔ دونوں فریق جمعرات کو شہریوں کے تحفظ اور انسانی بنیادوں پر رسائی کے لیے ایک معاہدے پر متفق ہوئے تھے تاہم لڑائی میں کمی نہیں آئی اور خرطوم اور آس پاس کے علاقوں میں جھڑپیں اور فضائی حملے ہوئے۔جدہ میں دوبارہ مذاکرات میں فریقین جمعرات کے معاہدے پر عمل درآمد کے طریقہ کار پر بات چیت شروع کریں گے۔ اس میں امداد کی فراہمی، محفوظ طریقے سے نقل مکانی اور شہری علاقوں سے فورسز کو ہٹانے کے نکات شامل ہیں۔ اس کے بعد بات چیت تنازعات کو ختم کرنے کی جانب بڑھے گی جو سویلین حکومت کے لیے راہ ہموار کرے گی۔ سعودی سفارتکار نے کہا کہ تصادم کی نوعیت بات چیت کو متاثر کرتی ہے۔ اس کے باوجود مجھے لگتا ہے کہ دونوں طرف سے اچھے جذبات موجود ہیں۔