اسرائیل کیخلاف جنگی جرائم کی تحقیقات کا دروازہ کھل گیا

عالمی فوجداری عدالت نے مقبوضہ فلسطینی علاقوں میں اسرائیلی جرائم کی تحقیقات کی درخواست منظور کرلی، فریقین کو 16مارچ تک دلائل جمع کرانے ہوں گے
فلسطین کوریاست کا درجہ حاصل نہیں، امریکا اور جرمنی کے ساتھ برازیل،ہنگری،آسٹریا،چیک ری پبلک اور آسٹریلیا اسرائیل کی حمایت میں کھڑ ے ہوگئے
ہیگ (نیوزڈیسک) عالمی فوجداری عدالت نے مقبوضہ فلسطینی علاقوں میں اسرائیلی جرائم کی تحقیقات کیلئے بیرون ملک فلسطینیوں کی نمائندہ کانگریس کی درخواست منظور کر لی ہے، درخواست میں 1967کی جنگ میں قبضے میں لیے گئے علاقوں میں صہیونی ریاست کے ناجائز تسلط اور فلسطینیوں کے خلاف جرائم کی تحقیقات کا مطالبہ کیا گیاہے، عدالت نے درخواست منظور کرتے ہوئے کہا ہے کہ درخواست پر اسرائیلی ریاست کی ناقابل قبول سرگرمیوں کی تحقیقات کی جائے گی، اس سے پہلے اسلامی کانفرنس تنظیم،عرب لیگ نے بھی عدالت سے اسرائیل کے خلاف جنگی جرائم کی تحقیقات پر زور دیا تھا، عدالت نے تمام فریقین کو 16مارچ تک اپنے دلائل جمع کرانے کیلئے کہا ہے، دوسری جانب امریکا اور جرمنی کے ساتھ برازیل،ہنگری،آسٹریا،چیک ری پبلک اور آسٹریلیا اسرائیل کی حمایت میں کھڑ ے ہوگئے ہیں،ان ممالک کا موقف ہے کہ فلسطین کوریاست کا درجہ حاصل نہیں لہذا عالمی فوجداری عدالت اسرائیل کے خلاف مقدمہ نہیں چلاسکتی،اسرائیل نے اپنی حمایت پر ان ممالک کا شکریہ ادا کیا ہے۔