اسرائیلی حملے معاہدے کو خطرے میں ڈال سکتے ہیں، حماس سربراہ

دوحہ : حماس کے سربراہ خلیل الحیہ نے خبردار کیا ہے کہ غزہ میں اسرائیلی حملوں میں اضافہ جنگ بندی معاہدے کو خطرے میں ڈال سکتا ہے۔ ثالث اور ضامن ممالک اسرائیل کو حملے روکنے پر مجبور کریں۔ خلیل الحیہ نے کہا کہ اسرائیل جنگ بندی معاہدے اور ثالثی کی کوششوں کو نظر انداز کر رہا ہے۔ خلیل الحیہ کے مطابق حملے جاری رہے تو جنگ بندی معاہدہ ختم ہونے کا خطرہ پیدا ہوسکتا ہے۔ انہوں نے ثالثوں اور ضامن ممالک کو اسرائیلی حملے روکنے اور جنگ بندی کے تحفظ کے لیے فوری کارروائی کا مطالبہ کیا۔
ادھر حماس کے ترجمان حازم قاسم نے غزہ سٹی میں پولیس کے ایک مرکز پر اسرائیلی فضائی حملے کو خطرناک اور وحشیانہ قتل عام قرار دیا۔ حازم قاسم نے کہا کہ پیس کونسل نے اپنے اثر و رسوخ کو استعمال کرتے ہوئے اسرائیل کو طے شدہ معاہدوں پر عمل درآمد پر مجبور نہیں کیا۔ ترجمان نے پیس کونسل کے حالیہ بیانات کو بھی تنقید کا نشانہ بناتے ہوئے کہا کہ ان سے اسرائیلی فوجی کارروائیوں کی حوصلہ افزائی ہوسکتی ہے.