Raza Musani 
غزہ : جنگ بندی معاہدے کے باوجود اسرائیلی فوج نے غزہ کے مختلف علاقوں میں مزید حملے شروع کر دیے ہیں۔ اسرائیلی حملوں اور فائرنگ سے بچوں سمیت پانچ فلسطینی شہید اور کئی زخمی ہوگئے۔
الجزیرہ کے مطابق اسرائیلی فوج نے غزہ کے ان علاقوں میں بھی حملے کیے جو اس کے براہِ راست فوجی کنٹرول میں نہیں ہیں۔
طبی ذرائع کا کہنا ہے کہ خان یونس میں الگ الگ اسرائیلی حملوں میں کم از کم تین فلسطینی شہید ہوئے جن میں پندرہ سالہ لڑکا شامل ہے۔ رفح میں دو فلسطینی صیہونی فوجیوں کی گولیوں کا نشانہ بنے۔ جبکہ ایک فلسطینی کو مغربی کنارے کے علاقے نیگیو میں گولیاں ماری گئیں۔
مرکزی غزہ میں البریج پناہ گزین کیمپ کے مشرق میں اسرائیلی فائرنگ سے متعدد افراد زخمی ہوئے۔ شمالی غزہ میں غزہ سٹی کے طفاح محلے میں اسرائیلی فورسز نے گھروں اور شہری انفراسٹرکچر کی مسماری جاری رکھی۔
ادھر شجاعیہ اور زیتون کے علاقوں میں بھی توپ خانے کی گولہ باری اور ڈرون حملوں سے مزید تباہی کی اطلاعات ہیں۔
