زلزلے سے متاثرہ شام پر اسرائیلی جارحیت، میزائل حملے میں 5 افراد جانبحق، متعدد زخمی

دمشق: زلزلے سے متاثرہ شام کے دارالحکومت دمشق پر اسرائیل کے میزائل حملے میں خاتون سمیت 5 افراد جانبحق اور متعدد زخمی ہوگئے ہیں۔اسرائیل نے دمشق کے وسطی علاقے کفر سوسہ میں واقع ایک عمارت کو میزائلوں کا نشانہ بنایا۔ مقامی وقت کےمطابق رات ساڑھے بارہ بجے کے قریب دارالحکومت میں زور دار دھماکے سنے گئے۔ سیریئن آبزرویٹری فار ہیومن رائٹس نے اطلاع دی ہے کہ دمشق کے دیہی علاقوں میں ایرانی ملیشیا اور حزب اللہ کے زیرِ استعمال عمارتوں اور ایک ایرانی اسکول پرحملہ کیا گیا۔ میزائل حملے میں متعدد گھروں کو نقصان پہنچا۔ ایک دس منزلہ عمارت کو بھی بری طرح نقصان پہنچا۔ اسے اب تک کا سب سے سنگین حملہ قرار دیا جارہا ہے۔