لبنان میں اسرائیلی کارروائیاں ممکنہ جنگی جرم ہیں، اقوام متحدہ

نیو یارک : اقوام متحدہ کے ہائی کمشنر برائے انسانی حقوق وولکر ترک نے کہا ہے کہ لبنان میں اسرائیلی کارروائیاں بین الاقوامی انسانی قانون کی سنگین خلاف ورزیاں ہیں، جن میں سے بعض ممکنہ طور پر جنگی جرائم کے زمرے میں آتی ہیں۔ وولکر ترک نے بیروت میں میڈیا سے گفتگو کے دوران اسرائیلی کارروائیوں پر شدید تشویش کا اظہار کیا۔ انہوں نے کہا کہ دریائے لیطانی کے جنوب میں واقع کئی دیہات اسرائیلی حملوں میں مکمل طور پر تباہ ہو چکے ہیں۔ وولکر ترک کے مطابق 2 مارچ سے اب تک لبنان میں 4,300 سے زائد افراد شہید اور 12,200 زخمی ہو چکے ہیں۔ وولکر ترک نے کہا کہ اپریل میں جنگ بندی کے اعلان اور کشیدگی کم کرنے کے لیے مذاکرات کے باوجود اسرائیلی فضائی اور زمینی کارروائیاں جاری ہیں۔ یہ علاقے اب رہائش کے قابل نہیں رہے۔