اسرائیل عالمی قوانین کی پامالی سے باز آجائے،پاکستان

اسرائیل ایسے یکطرفہ اقدام سے گریز کرے جو فلسطینی علاقوں پر قبضے کا باعث، بین الاقوامی قوانین اور اقوام متحدہ کی قراردادوں کی پامالی کا سبب بنے
وزیر خارجہ شاہ محمود قریشی کا او آئی سی اجلاس سے خطاب، غرب اردن کے علاقوں کو مقبوضہ علاقوں میں شامل کرنے والے صہیونی منصوبے پر تشویش
اسلام آباد(نیوز ڈیسک) وزیر خارجہ شاہ محمود قریشی نے اسرائیل کو تنقید کا نشانہ بناتے ہوئے کہا ہے کہ اسرائیل بین الاقوامی قوانین کی پامالی کا سبب بن رہا ہے، شاہ محمود قریشی نے فلسطین میں غرب اردن کے علاقوں کو مقبوضہ علاقوں میں شامل کرنے والے صہیونی منصوبے پر تشویش ظاہرکرتے ہوئے غاصب صہیونی ریاست سے مطالبہ کیا کہ وہ بین الاقوامی قوانین اور عالمی ضابطوں کی مسلسل خلاف ورزی سے باز آ جائے ،ریاض میں اسلامی تعاون تنظیم کے وزارتی اجلاس سے ویڈیو لنک کے ذریعے خطاب کرتے ہوئے پاکستان کے وزیر خارجہ نے فلسطین کی حمایت پر زور دینے کے ساتھ ساتھ فلسطینی عوام کے ساتھ اظہار یکجہتی کیا،انہوں نے کہا کہ اسلام آباد تل ابیب سے یہ مطالبہ کرتا ہے کہ وہ ایسے ہر یکطرفہ اقدام سے گریز کرے جو فلسطینی علاقوں پر قبضہ کرنے کا باعث اور بین الاقوامی قوانین کے علاوہ اقوام متحدہ کی قراردادوں کی پامالی کا سبب بنے۔