اسرائیل فلسطینی شناخت مٹانے کی منظم کوشش کررہا ہے، او آئی سی

جدہ: اسلامی تعاون تنظیم نے مسجد اقصیٰ کے اطراف تاریخی عمارتوں۔ فلسطینی املاک اور اسلامی اوقاف پر اسرائیلی قبضے کو بیت المقدس کی فلسطینی شناخت مٹانے کی منظم کوشش قرار دیا ہے۔او آئی سی نے ایک بیان میں کہا کہ اسرائیلی اقدامات کا مقصد فلسطینی عوام کے تاریخی، تہذیبی اور ثقافتی ورثے کو مٹانا اور مقدس مقامات کی قانونی و تاریخی حیثیت کو کمزور کرنا ہے۔ او آئی سی نے اسرائیلی حکام کی جانب سے مقبوضہ بیت المقدس میں اقوام متحدہ کے ادارے انروا کے ہیڈکوارٹر کو نام نہاد اسرائیلی وزارتِ سکیورٹی کے میوزیم اور دفتر میں تبدیل کرنے کے منصوبے کی شدید مذمت کی۔ بیان میں عالمی برادری سے فوری مداخلت کا مطالبہ کرتے ہوئے کہا گیا کہ اسرائیل کو بیت المقدس، اس کے شہریوں، اسلامی و مسیحی مقدس مقامات اور تاریخی آثار کے خلاف کارروائیاں روکنے پر مجبور کیا جائے۔