Raza Musani 
تل ابیب: اسرائیل نے امریکا کو خبردار کیا ہے کہ ایران کے ساتھ جاری جنگ کے دوران اس کے پاس بیلسٹک میزائل روکنے والے دفاعی میزائل تیزی سے کم ہو رہے ہیں۔ امریکی خبر رساں ویب سائٹ سیمافور کی رپورٹ کے مطابق اسرائیل گزشتہ موسم گرما میں ایران کے ساتھ کشیدگی کے بعد پہلے ہی محدود دفاعی میزائلوں کے ساتھ جنگ میں داخل ہوا تھا۔ ایران کی جانب سے میزائلوں اور ڈرون حملوں کی مسلسل بارش نے اسرائیل کے دفاعی نظام پر شدید دباؤ ڈال دیا ہے۔
رپورٹ کے مطابق ایران نے بعض میزائلوں میں کلسٹر بارود شامل کرنا شروع کر دیا ہے جس سے اسرائیلی دفاعی نظام پر مزید دباؤ بڑھ سکتا ہے۔ ایک امریکی عہدیدار کے مطابق واشنگٹن کو کئی ماہ سے اسرائیل کے محدود انٹرسیپٹر ذخائر کا علم تھا اور اس صورتحال کا اندازہ بھی تھا۔ تاہم عہدیدار نے واضح کیا کہ امریکا کو اس وقت انٹرسیپٹرز میزائل کی کسی کمی کا سامنا نہیں ہے۔
