اسرائیل امریکا کی غیر مشروط حمایت کیساتھ غزہ پر حملے جاری رکھے ہوئے ہے، حماس

غزہ : حماس نے اسرائیل پر غزہ میں شہریوں کے خلاف قتلِ عام کا الزام عائد کرتے ہوئے کہا ہے کہ اسرائیلی فوج علاقائی کشیدگی کا فائدہ اٹھا کر اپنی کارروائیاں تیز کر رہی ہے۔ حماس کے ترجمان حازم قاسم نے ایک بیان میں فلسطینیوں کے قتل اور حملوں کے واقعات کو خطرناک پیش رفت اور جنگ بندی معاہدے کی کھلی خلاف ورزی قرار دیا۔ انہوں نے کہا کہ اسرائیل رفح کراسنگ اور دوسری سرحدی گزر گاہیں بند رکھ کر غزہ کے محاصرے کو مزید سخت کر رہا ہے۔ ان کا کہنا تھا کہ اسرائیل امریکا کی غیر مشروط حمایت پر انحصار کرتے ہوئے غزہ میں حملے جاری رکھے ہوئے ہے اور جنگ بندی کی خلاف ورزیاں کر رہا ہے۔ حازم قاسم نے بین الاقوامی ثالثوں سے مطالبہ کیا کہ وہ فوری مداخلت کر کے اسرائیلی فوجی مہم کو روکیں، شہریوں کے خلاف کارروائیاں بند کرائیں اور غزہ کی پٹی پر عائد محاصرہ ختم کرائیں۔
ادھر حماس نے ایک بیان میں متنبہ کیا ہے کہ مسجد اقصیٰ کی مسلسل گیارہویں روز تالہ بندی اور ماہِ رمضان کے دوران نمازِ تراویح اور اعتکاف پر پابندی ایک ایسا خطرناک اور سنگین تاریخی واقعہ ہے جس کی مثال انیس سو سڑسٹھ کے بعد سے اب تک نہیں ملتی۔