اصفہان ڈرون حملہ، ایران کا اسرائیل سے بدلہ لینے کا اعلان

تہران : ایران نے اصفہان میں فوجی تنصیبات پر حملے کا ذمہ دار اسرائیل کو قرار دیتے ہوئے بدلہ لینے کا اعلان کیا ہے۔ اقوام متحدہ میں ایران کے مندوب عامر سعید نے اقوام متحدہ کے سیکریٹری جنرل انتونیو گوتریس کو خط لکھ دیا۔ خط کے مطابق ابتدائی تحقیقات میں یہ بات سامنے آئی ہے کہ ہفتے کی رات اسرائیل نے اصفہان میں ڈرون حملے کیے۔ اسرائیل کی حرکت عالمی قوانین کی خلاف ورزی ہے۔ قومی سلامتی کے دفاع میں کوئی بھی کارروائی کرنا ایران کا قانونی حق ہے۔ اسرائیل کی جانب سے لاحق کسی بھی خطرے کا بھرپور جواب دیا جائے گا۔ ایران جواب دینے کا حق محفوظ رکھتا ہے۔ جواب کا وقت اور طریقہ جو ضروری محسوس ہوا اختیار کیا جائے گا۔