خطے سے امریکی فوج کا ہر صورت خاتمہ ہونا چاہئے (عالمی مزاحمتی کانفرنس)

عراق سمیت پورے خطے میں امریکی موجودگی غیر قانونی ہے،امت مسلمہ امریکی فوج کو نکال باہر کرنے کیلئے مل کر کوششیں کرے،کانفرنس کا اعلامیہ
دشمن سے ہمیشہ ہوشیار رہیں،آیت اللہ خامنہ ای کا پیغام، امریکی منصوبہ کبھی کامیاب نہیں ہوسکتا،فلسطینی سفیر،علما امریکی فتنوں کے خلاف ڈٹ جائیں،یمنی مفتی اعظم
بغداد (نیوز ڈیسک)عراق میں مزاحمتی کانفرنس نے سینچری ڈیل کو مسترد کرتے ہوئے خطے سے امریکی افواج کو باہر نکالنے پر زور دیا ہے، العراق المقاوم کے عنوان سے کانفرنس میں فلسطینی سفیر، حماس اور دوسری مزاحمتی تنظیموں کے نمائندوں نے شرکت کی، سید مجتبی حسینی نے کانفرنس کے نام ولی امر مسلمین آیت اللہ سید علی خامنہ ای کا پیغام پڑھ کر سنایا اور دشمن سے ہمیشہ ہوشیار رہنے اور ظلم و تعدی کے خلاف ڈٹ جانے پر زور دیا،بغداد میں فلسطینی سفیر احمد عقیل نے کہا کہ فلسطینی "صدی کی ڈیل” کے لئے کسی قسم کی اہمیت کے قائل نہیں جبکہ یہ سازشی منصوبہ کسی طور کامیاب نہیں ہو سکتا،عراقی محکمہ اوقاف کے سربراہ عبداللطیف الھمیم نے اپنے خطاب میں کہا کہ شیعہ و سنی، واحد اسلامی و انسانی تمدن کو تشکیل دینے والا عالم انسانیت کا وہ اہم اثاثہ ہیں جس کی شناخت "قدس” شریف ہے، یمن کے مفتی اعظم علامہ شمس الدین شرف نے کہا کہ خطے کے علماء کو امریکی فتنوں سے باخبر اور ان سے مقابلے پر ڈٹ جانا چاہئے،کانفرنس کے بعد جاری اعلامیہ میں سینچری ڈیل منصوبے کی مذمت کی گئی اور کہا گیا کہ”صدی کی ڈیل” نامی منصوبہ دراصل امت مسلمہ اور خطے کے ممالک کے خلاف "شیطان بزرگ” کی ایک سازش ہے لہذا مسلم ممالک کو غاصب صہیونی رژیم اسرائیل کے ساتھ معمول کے دوستانہ تعلقات استوار کرنے سے اجتناب کرنا چاہئے کیونکہ ایساکرنا امتِ مسلمہ کے ساتھ غداری ہے، عراق سمیت پورے خطے میں امریکی موجودگی غیر قانونی ہے جس کا ہر طور خاتمہ کیا جانا چاہئے،امت مسلمہ سے مطالبہ کیاگیا کہ وہ خطے سے امریکی فوج کو نکال باہر کرنے کیلئے مل کر کوششیں کریں۔