ایران کا یمن کی آزادی، خودمختاری اور سالمیت کے احترام پر زور

تہران : ایران نے یمن کی آزادی، خودمختاری اور سالمیت کے احترام پر زور دیتے ہوئے ملک کا غیرقانونی اور غیرانسانی محاصرہ فوری ختم کرنے کا مطالبہ کیا ہے۔ ایرانی وزارت خارجہ نے کہا ہے کہ یمن کے بحران کا حل فوجی دباؤ اور محاصرے کے بجائے مذاکرات اور سیاسی عمل سے ممکن ہے۔ ایران نے کہا کہ مغربی ایشیا اور بحیرہ احمر میں امن و استحکام یمنی عوام کے جائز حقوق اور وقار کے احترام کے بغیر ممکن نہیں۔
ایرانی وزارت خارجہ کے مطابق یمنی عوام کو دباؤ، دھمکی اور جابرانہ محاصرے سے آزاد باوقار زندگی گزارنے کا حق ہے۔ ایران نے کہا کہ یمن کے مسائل محاصرے یا فوجی اتحاد کے ذریعے حل نہیں کیے جاسکتے۔ تہران نے طے شدہ روڈ میپ کے تحت مذاکرات فوری بحال کرنے اور اس کی شقوں پر عمل درآمد پر زور دیا۔ ایرانی وزارت خارجہ نے کہا کہ ایران اس مقصد کیلئے اپنی ہر ممکن سفارتی کوشش کرنے کیلئے تیار ہے۔ ایران کے مطابق یمن کی وحدت اور علاقائی سالمیت برقرار رہنی چاہیے اور دیرپا حل کیلئے یمنی فریقوں کے درمیان سیاسی عمل ہی راستہ ہے۔