Raza Musani 
تہران : خطے میں امریکی اہداف پر ایران کے میزائل اور ڈرون حملوں میں بڑے پیمانے پر نقصان ہوا ہے۔ اردن میں الازرق ائیر بیس پر حملے میں دو امریکی فوجی ہلاک اور چار زخمی ہوگئے۔ امریکی فوج کی سینٹرل کمانڈ نے تصدیق کی ہےکہ اردن میں تعینات 2 امریکی اہلکار ایرانی بیلسٹک میزائلوں اور ڈرون حملوں کے دوران ہلاک جبکہ 4 زخمی ہو گئے۔ایک اور امریکی اہلکار لاپتا ہے، جس کی تلاش جاری ہے۔ حملے میں بیس پر 2 فائٹر جیٹس اور 3 امریکی طیارے تباہ ہو گئے۔ حملے میں فائٹر جیٹ شیلٹرز، پارکنگ ریمپ کو بھی نشانہ بنایا گیا۔
ادھر کویت بھی شدید حملوں کی زد میں رہا۔ کویت آئل کمپنی کی تنصیب تباہ ہوگئی اور کئی افراد زخمی ہوگئے۔ حملے میں بجلی اور ڈی سیلینیشن پلانٹ کو نقصان پہنچا، پلانٹ میں آگ لگ گئی اور بڑے علاقے کی بجلی معطل ہوگئی۔
سعودی عرب کے شہر الخرج میں پرنس سلطان ایئر بیس کو میزائلوں سے نشانہ بنایا گیا ہے۔ یہ اڈہ امریکی فضائیہ کے ری فیولنگ ٹینکر طیاروں کی میزبانی کر رہا تھا، جنہوں نے ایران پر امریکی حملوں میں معاونت فراہم کی۔ حملے سے تنصیبات میں آگ لگ گئی۔ بحرین میں بھی امریکی اہداف کو نقصان پہنچا ہے۔
