ایرانی وزیر داخلہ کا دورہ پاکستان، آرمی چیف اور وزیراعظم سے ملاقاتیں

اسلام آباد: ایران کے وزیر داخلہ احمد وحیدی نے آرمی چیف قمر جاوید باجوہ اور وزیراعظم عمران خان سے ملاقاتیں کی جس میں سیکیورٹی اور سرحدی مسائل سمیت مختلف موضوعات پر گفتگو ہوئی۔ آرمی چیف سے ملاقات کے موقع پر پاکستان میں ایرانی سفیر سید محمد علی حسینی، سرحدی فورس کے کمانڈر جنرل احمدعلی گودرزی اور فوجی اتاشی کرنل مصطفیٰ قنبرپور بھی موجود تھے۔ ملاقات میں ایران و پاکستان سے جڑے مسائل کی تازہ ترین صورتحال کا جائزہ لیا گیا جس میں سیکیورٹی و سرحدی مسائل کے علاوہ افغانستان کی صورتحال پر بھی تبادلۂ خیال ہوا۔ اس سے پہلے انہوں نے وزیر اعظم عمران خان سے ملاقات کی جس میں دونوں فریقوں نے دوطرفہ تعاون کو مضبوط بنانے بالخصوص مشترکہ تجارت کو آسان بنانے پر زور دیا۔ ایران کے وزیر داخلہ کی موجودگی کا خیرمقدم کرتے ہوئے عمران خان نے دونوں ہمسایہ اور برادر ممالک کے درمیان امن اور دوستی کی سرحدوں کی حفاظت کو مضبوط بنانے کی اہمیت پر زور دیا۔ عمران خان نے افغانستان میں ہونے والی پیش رفت کا ذکر کرتے ہوئے کہا کہ اس ملک کے مسائل کے حل کے لیے فوجی حل کبھی بھی راستہ نہیں رہا ہے اور اب عالمی برادری کو افغان عوام کو شدید انسانی اور اقتصادی بحران سے بچانے کے لیے اپنا کردار ادا کرنا چاہیے۔