Raza Musani 
تہران : ایران کے خاتم الانبیاء ہیڈکوارٹر کے کمانڈر جنرل علی عبداللہی نےکہا ہےکہ ایرانی افواج سپریم لیڈر کے قتل کا بدلہ ضرور لیں گی۔ ایک بیان میں کمانڈر جنرل عبداللہی کا کہنا تھا کہ قاتلوں سے قصاص لیں گے اور ان کو کیفر کردار تک ضرور پہنچائيں گے۔ انہوں نے امریکا اور اسرائیل کو عوام کے سوگ کو کمزوری کی علامت سے تعبیر کرنے سے خبردار کرتے ہوئے اس بات پر زور دیا کہ عالمی طاقتیں مجرم امریکہ اور ظالم صیہونی حکومت کی قیادت میں قوم کے غم اور غصے کو کمزوری نہ سمجھیں، انہیں اپنے جرائم کا حساب دینا ہوگا۔ایرانی قوم کے بہادر فوجی جوان دشمن کی نیندیں حرام کردیں گے اور جلد یا بدیر ان دہشت گردانہ جرائم کے ذمہ دار عناصر سے انتقام لے کر رہیں گے۔
انہوں نے بڑے پیمانے پر جنازے کے جلوسوں کو ایمان، مزاحمت اور یکجہتی کا طاقتور مظاہرہ قرار دیا۔ انہوں نے کہا کہ عظیم الشان جنازے تاریخ میں عظمت، بصیرت، جہاد اور شجاعت کی لازوال علامت کے طور پر لکھے جائیں گے۔ انہوں نے جنازے کو ایک طاقتور سیاسی اور مذہبی اعلان قرار دیتے ہوئے کہا کہ امت اسلامیہ کی بے مثال موجودگی ایک الوداعی تقریب سے کہیں بڑھ کر تھی، یہ انصاف کے لیے ایک زبردست پکار اور عالمی تسلط پسند طاقتوں کے منصوبوں کو فیصلہ کن ردّ کرنے والی تھی، جو حق کو باطل سے واضح طور پر ممتاز کرتی تھی.
