Raza Musani 
تہران: ایران نے آبنائے ہرمز دوبارہ کھولنے کے لیے شرائط کی فہرست تیار کرنے کا اعلان کیا ہے۔ ایران کے سپریم نیشنل سکیورٹی کونسل کے سیکریٹری محسن رضائی نےکہا کہ خطے میں جنگ کا خاتمہ ان شرائط میں شامل ہے۔
۔قطری وزیراعظم و وزیرخارجہ شیخ محمد بن عبدالرحمان بن جاسم الثانی سے ملاقات کے بعد محسن رضائی نے کہا کہ امریکا کو پہلے ایران کی شرائط پوری کرنے کیلئے عملی اقدامات کرنا ہوں گے، اس کے بعد ہی ایران آبنائے ہرمز کو دوبارہ کھولے گا۔ انہوں نے کہا کہ ایران کو امریکا پر اعتماد نہیں کیونکہ وہ ماضی میں کئی مرتبہ سفارت کاری اور مذاکرات کو دھوکا دے چکا ہے۔ انہوں نے خبردار کیاکہ اگر امریکا نے ایران کے خلاف کوئی کارروائی کی تو تہران امریکی فوجی اور معاشی مفادات کو ایسا نقصان پہنچائے گا جو تاریخ میں یاد رکھا جائے گا۔
قطری وزیراعظم نے تہران میں ایرانی صدر مسعود پزشکیان۔ وزیر خارجہ عباس عراقچی اور اسپیکر باقر قالیباف سے بھی ملاقاتیں کیں اور خطے میں مذاکرات کے لیے سازگار ماحول پیدا کرنے کی کوششوں پر تبادلہ خیال کیا۔ عرب میڈیا کے مطابق قطری حکام کا کہنا ہےکہ ملاقات میں آبنائے ہرمز میں بارودی سرنگیں صاف کرنے کا مشترکہ منصوبہ معاہدے میں شامل کرنے پر تبادلہ خیال ہوا۔
