Raza Musani 
تل ابیب : اسرائیلی اخبار کی رپورٹ کے مطابق اسرائیل کے اندرونی سیکیورٹی حلقوں نے حماس کے خلاف اپنی انٹیلی جنس ایجنسیوں کی مکمل ناکامی کا اعتراف کیا ہے۔ عبرانی اخبار یدیعوت احرونوت کی رپورٹ کے مطابق گذشتہ دو دہائیوں میں اسرائیلی انٹیلی جنس ایجنسیاں حماس کی قیادت میں داخل ہونے یا اسے اندرونی معلومات فراہم کرنے میں مکمل طور پر ناکام رہی ہیں۔ جس کی وجہ سے طوفان الاقصیٰ آپریشن کی کوئی پیشگی اطلاع نہیں مل سکی۔
رپورٹ کے مطابق دو ہزار پانچ میں غزہ سے انخلاء کے بعد اسرائیل کیلئے کسی جاسوس کو حماس میں داخل کرنے کی کوئی کوشش کامیاب نہیں ہوسکی۔ انخلا کے بعد معیشت، سیاحت اور سفارتی تعلقات جیسے روایتی انٹیلی جنس چینلز کے راستے جاسوس بھرتی کرنا تقریباً ناممکن ہو گیا۔ رپورٹ کےمطابق حماس کا منظم، خفیہ، عقائدی اور مضبوط ڈھانچہ اسرائیلی ناکامی میں ایک کلیدی عنصر رہا، جس نے قابض اسرائیل کے انٹیلی جنس اقدامات کو ہر سطح پر بے اثر کر دیا۔
