عمران خان کی گرفتاری کی کوشش، ملک بھر میں عوام سراپائے احتجاج

لاہور: سابق وزیراعظم عمران خان کی گرفتاری کی کوشش کیخلاف ملک بھر میں شدید احتجاج کیا گیا۔ اسلام آباد پولیس مقامی پولیس کے ساتھ عمران خان کوگرفتار کرنے لاہور کے علاقے زمان ٹاؤن پہنچی ۔ تو کارکن آہنی دیوار بن گئے۔ عمران خان کی گرفتاری کیلئے منگل کے دن ڈھائی بجے شروع کیا گیا آپریشن پوری قوت کے ساتھ رات بھر جاری رہا۔ پولیس کی بھاری نفری نے رات گئے اور آج صبح کئی بار زمان پارک کی جانب پیش قدمی کی کوشش کی لیکن کامیاب نہ ہوسکی۔ کارکنوں کو منتشر کرنے کیلئے اندھا دھند شیلنگ سے لوگوں کا سانس لینا دشوار ہوگیا ۔ لاٹھی چارج اور پتھراؤں سے اہلکاروں سمیت درجنوں افراد زخمی ہوگئے۔ پولیس نے درجنوں کارکنوں کو گرفتار کرلیا۔ کارکنوں کے پتھراؤ اور مزاحمت سے پولیس پیچھے ہٹنے پر مجبور ہو گئی۔ لاہور میں آپریشن کی اطلاع ملتے ہی کراچی۔ لاہور ۔ پشاور اور کوئٹہ، راولپنڈی سمیت پورے ملک میں ہزاروں کارکن سڑکوں پر نکل آئے۔ کراچی میں پولیس اور مظاہرین کے درمیان جھڑپیں ہوئیں۔ مظاہرین نے سڑکوں پر ٹائر جلائے اور ٹریفک معطل کردیا۔