عمران خان کا اسٹیبلشمنٹ سے مذاکرات کے دروازے بند کرنے کا اعلان

راولپنڈی : سابق وزیراعظم عمران خان نے اسٹیبلشمنٹ کے ساتھ مذاکرات کے دروازے بند کرنے کا اعلان کردیا۔ اڈیالہ جیل میں صحافیوں سے غیر رسمی گفتگو میں عمران خان نے کہا کہ اسٹیبلشمنٹ نے ہمیں دھوکا دیا اب ان سے کوئی بات نہیں ہوگی۔ یہ آج بھی یحییٰ خان والی پالیسی کو لے کر چل رہے ہیں۔ عمران خان نے کہا کہ ملک میں اس وقت غیر اعلانیہ مارشل لاء ہے، ملک کو جمہوریت اور قانون کی بالادستی ہی بچا سکتی ہے۔ عمران خان نے کہاکہ اسٹیبلشمنٹ کیخلاف وزیراعلیٰ خیبرپختونخوا علی امین گنڈا پور کا بیان قوم کے جذبات کی ترجمانی ہے اور میں اس کے ساتھ کھڑا ہوں۔ علی امین گنڈا پور کے بیان پر معافی مانگنے والا بزدل ہے اسے پارٹی چھوڑ دینا چاہئے۔ عمران خان نے کہا کہ ایک صوبے کے وزیر اعلیٰ کو اٹھا کر آپ نفرتیں بڑھا رہے ہیں اور ملک کو تباہی کی جانب لے جا رہے ہیں۔