کورونا وبا کی آڑ میں سنیچری ڈیل کے نفاذ کی کوشش

غاصب صہیونیوں نے سازشی منصوبے پر کام تیز کر دیا ہے، عوامی کمیٹی
غزہ (نیوز ڈیسک) غزہ کے محاصرے کے خلاف مہم کی عوامی کمیٹی کے سربراہ جمال الخضری نے کہا ہے کہ امریکا و اسرائیل دنیا میں جاری انسداد کورونا مہم کی آڑ میں سینچری ڈیل سازشی منصوبے کے نفاذ کی کوشش کر رہے ہیں ، امریکا نے غرب اردن کے علاقوں کو مقبوضہ علاقوں میں شامل کرنے کے لئے صہیونی حکومت کو ہری جھنڈی دے دی ہے اور غاصب صہیونیوں نے بھی اس سازشی منصوبے پر کام تیز کر دیا ہے، انہوں نے کہا کہ مقبوضہ فلسطین میں نتن یاہو کی کابینہ تشکیل پانے کے بعد غرب اردن کے علاقوں کو اسرائیل میں شامل اور فلسطینیوں کے حقوق پامال کرنے والے منصوبے پر سرگرمیاں تیز ہو گئی ہیں۔الخضری نے کہا کہ سازشی منصوبے پر عمل درآمد کے لئے غاصب صہیونی ٹولے کی کوششوں کے باوجود فلسطینی قوم کے عزائم کبھی متزلزل نہیں ہوں گے۔