اپنی ذمہ داریاں پوری کریں تو شکست دشمن کا مقدر بنے گی،ولی امر مسلمین

ایران کے خلاف دشمنوں کے دباو¿ کا نتیجہ دشمنوں کے سینے پر ایرانی عوام کے زور دار گھونسے کی شکل میں نکلے گا اور دشمن پیچھے ہٹنے پر مجبور ہو جائیں گے
دشمن کا ابلاغیاتی شور شرابہ اور رائے عامہ کے ذہنوں کو خراب کرنا، اصلاح کے عمل میں موجود رکاوٹوں میں سے ایک ہے،عدلیہ کے عہدیداران سے خطاب
تہران (نیوز ڈیسک) ولی امر مسلمین آیت اللہ خامنہ ای نے کہا ہے کہ ایران کے خلاف دشمنوں کے دباو¿ کا نتیجہ دشمنوں کے سینے پر ایرانی عوام کے زور دار گھونسے کی شکل میں نکلے گا اور دشمن پیچھے ہٹنے پر مجبور ہو جائیں گے ، اگر ہم اپنی ذمہ داریوں کو پورا کریں تو ملک دشمن عناصر جو بھی کریں ان کو شکست کا سامنا ہوگا ،عدلیہ کے اعلی عہدیداروں سے ویڈیو کانفرنس کے ذریعے خطاب میں ولی امر مسلمین نے امریکا، برطانیہ اور یورپی حکومتوں کے مخاصمانہ اقدامات کے مقابلے میں ایران کو محفوظ رکھنے کی ضرورت پر زور دیا،انہوں نے کہاکہ اگر ہم اپنی ذمہ داریوں پر عمل کریں گے تو توفیق الہی سے دشمن کا ہر حربہ ناکام رہے گا اور وہ اپنے مقاصد پورے نہیں کر سکے گا،انہوںنے ملک میں اصلاح اور بہتری کی ہر تحریک کو ناکام بنانے کیلئے دشمنوں کی بلا وقفہ کوششوں کی جانب اشارہ کرتے ہوئے کہاکہ دشمن کا ابلاغیاتی شور شرابہ اور رائے عامہ کے ذہنوں کو خراب کرنا، اصلاح کے عمل میں پائی جانے والی رکاوٹوں میں سے ایک ہے ، تبدیلی کے مخالف تمام عناصر اور عوامل کے موثر مقابلے کا واحد راستہ یہ ہے کہ کمزروی نہ دکھائی جائے، استقامت کا مظاہرہ کیا جائے اور خدا پر بھروسہ کرتے ہوئے پوری شجاعت کے ساتھ اصلاح کے راستے پر قدم آگے بڑھایا جائے، انہوں نے امریکا میں جاری نسل پرستی مخالف تحریک اور اس پر امریکی صدر کے جارحانہ اقدامات کی جانب بھی اشارہ کیا اور کہا کہ مغربی ممالک حقائق کے برعکس فلموں میں اپنے عدالتی نظام کو آئیڈیل کے طور پر پیش کرتے ہیں اور ان کی اکثر فلموں میں نا انصافیوں کا ذکر تک بھی نہیں کیا جاتا۔