مزاحمت کے بغیر لبنان کا وجود خطرے میں ہے، ہم طویل جنگ کیلئے تیار ہیں، سربراہ حزب اللہ

حزب اللہ کے سیکریٹری جنرل شیخ نعیم قاسم کا کہنا ہے کہ جاری جنگ صیہونی جارحیت کے خلاف ایک جائز دفاع ہے۔ انہوں نے خبردار کیا کہ مزاحمت کے سوا کوئی راستہ نہیں، ورنہ لبنان کا وجود خطرے میں پڑ سکتا ہے۔ یوم القدس کے موقع پر خطاب کرتے ہوئے شیخ نعیم قاسم نے اس دعویٰ کو مسترد کر دیا کہ حالیہ میزائل حملوں نے صیہونی قبضے کو لبنان پر جارحیت کیلئے اکسایا۔ انہوں نے سوال کیا کہ کیا پندرہ ماہ سے جاری مسلسل جارحیت کسی کو اشتعال دلانے کیلئے کافی نہیں۔ ان کا کہنا تھا کہ صیہونی ریاست گھروں کی تباہی، اداروں خصوصاً القرض الحسن کو نشانہ بنانے اور پورے شہروں کو جبری بے دخل کر کے اپنی جارحیت کو مزید بڑھا رہی ہے۔ شیخ نعیم قاسم نے زور دیا کہ اس صورتحال کا واحد حل مزاحمت ہے۔ انہوں نے خبردار کیا کہ اگر مزاحمت نہ کی گئی تو لبنان اپنے وجود کو خطرے میں ڈال دے گا۔ حزب اللہ کے سربراہ نے کہا کہ تنظیم طویل معرکے کیلئے تیار ہے اور میدان جنگ ہی اس کی حقیقی صلاحیتوں کو ظاہر کرے گا۔ انہوں نے کہا کہ دشمن کو ہماری ثابت قدمی کا مشاہدہ ہوگا اور اس کی دھمکیاں ہمیں خوفزدہ نہیں کر سکتیں۔ شیخ نعیم قاسم نے حزب اللہ کے مجاہدین کو بے خوف قرار دیتے ہوئے کہا کہ وہ دشمن کا قریب سے مقابلہ کرنے کیلئے ہر وقت تیار ہیں۔