مذاکرات ناکام ہوئے تو فیصلہ کن جنگ ہوگی، انصار اللہ کا عرب اتحاد کو انتباہ

صنعا: انصار اللہ کے سیاسی بیورو کے رکن محمد البخیتی نے سعودی زیر قیادت اتحاد کو خبردار کیا ہے کہ اگر جنگ بندی مذاکرات ناکام ہوئے تو یمن پر جارحیت اور ناکہ بندی کے خاتمے کے لیے فیصلہ کن جنگ شروع ہو جائے گی۔ اگر ریاض کے ساتھ موجودہ مذاکرات نتیجہ خیز نہ ہوئے تو انصار اللہ یمن پر سعودی جارح اتحاد کی جارحیت اور سمندری، زمینی اور ہوائی گزرگاہوں کی ناکہ بندی کے خاتمے کے لیے فیصلہ کن جنگ میں داخل ہوجائے گی۔ ممکن ہے مذاکرات کامیاب نہ ہوں اور ہم لامحالہ جارحیت کے خاتمے کے لیے فیصلہ کن جنگ میں داخل ہوجائیں گے۔ یمنی عہدیدار نے سعودی اتحاد کےلیے لڑنے والے یمنیوں کو مشورہ دیا کہ وہ انصار اللہ کی افواج میں شامل ہوجائیں تاکہ وہ جلد از جلد لڑائی کو فیصلہ کن بنا سکیں۔ انہوں نے یمن کے بعض صوبوں میں امریکی اور برطانوی افواج کی موجودگی کا بھی حوالہ دیا اور کہا کہ امریکی فوجیوں کی موجودگی سعودی عرب کی قیادت میں لڑنے والے اتحاد کی حمایت اور اس کی کارروائیوں کا تسلسل ہے جبکہ اس اتحاد کی جارحیت کی حقیقت سب پر عیاں ہے۔