اگر زمینی حملہ کیا گیا تو کوئی دشمن فوجی زندہ واپس نہیں جائے گا، ایرانی آرمی چیف

تہران : ایرانی فوج کے سربراہ امیر حاتمی نے امریکا اور اسرائیل کو سخت وارننگ دیتے ہوئے کہا ہے کہ اگر زمینی حملہ کیا گیا تو کوئی دشمن فوجی زندہ واپس نہیں جائے گا۔ کمانڈر اِن چیف امیر حاتمی نے ویڈیو کانفرنس کے دوران بری، بحری، فضائی اور فضائی دفاعی افواج کے کمانڈرز سے خطاب کیا۔ انہوں نے خبردار کیا کہ اگر امریکا اور اسرائیل نے ایران پر زمینی دراندازی کی تو ایک بھی دشمن فوجی کو نہیں بخشا جائے۔ امیر حاتمی کا کہنا تھا کہ ایرانی افواج دفاعی اور جارحانہ دونوں محاذوں پر دشمن کی کسی بھی کارروائی کا بھرپور جواب دینے کے لیے مکمل طور پر تیار ہیں۔ انہوں نے کمانڈرز کو ہدایت دی کہ دشمن کی تمام نقل و حرکت اور سرگرمیوں پر کڑی نظر رکھی جائے۔ پاسدارانِ انقلاب کی فضائیہ کے کمانڈر بریگیڈیئر جنرل مجید موسوی نے ایران کو پتھر کے زمانے میں واپس بھیجنے کی دھمکیوں پر سخت ردعمل دیا ہے۔ انہوں نے کہا کہ ایسی دھمکیاں دراصل امریکی قیادت کو خود اپنے فوجیوں کی قبریں کھودنے کے مترادف ہیں۔ انہوں نے امریکی بیانات کو ہالی ووڈ کی خیالی سوچ قرار دیتے ہوئے کہا کہ ایران کسی بھی جارحیت کا بھرپور جواب دینے کی صلاحیت رکھتا ہے۔