Raza Musani 
دی ہیگ : بین الاقوامی فوجداری عدالت (آئی سی سی) کے ججوں نے پراسیکیوٹر کریم خان کو افغانستان میں مظالم کی تحقیقات دوبارہ شروع کرنے کی اجازت دے دی ہے۔افغانستان میں جنگی جرائم کی تحقیقات گذشتہ دوسال سے تعطل کا شکار ہے۔آئی سی سی کے فیصلے کے مطابق ججوں نے قرار دیا ہے کہ تحقیقات کو آگے بڑھایا جاسکتا ہے کیونکہ کابل فی الحال اپنے وعدے کے مطابق آئی سی سی کےدائرہ اختیار میں آنے والے مبیّنہ جرائم کی حقیقی تحقیقات نہیں کر رہا ہےگذشتہ سال اگست میں، طالبان کی حکمرانی کے آغاز کے وقت پراسیکیوٹر کریم خان نے عالمی عدالت کے ججوں پر زور دیا تھا کہ وہ تحقیقات کو آگے بڑھانے کی اجازت دیں۔ انھوں نے خبردار کیا تھا کہ افغانستان میں جنگی جرائم اور انسانیت مخالف جرائم کا سلسلہ جاری ہے۔ گذشتہ سال ستمبر میں کریم خان نے اعلان کیا تھا کہ وہ طالبان اور داعش کے عسکریت پسندوں کے جرائم کی تحقیقات دوبارہ شروع کرنا چاہتے ہیں۔انھوں نے کہا کہ استغاثہ امریکی افواج اور افغان حکومت کے فوجیوں کی جانب سے مشتبہ جنگی جرائم کی تحقیقات کو’’عدم ترجیح‘‘ دے سکتا ہے۔
