رفح میں عمارتوں کے ملبے تلے سینکڑوں لاشیں دبی ہوئی ہیں

جنیوا : یورو میڈیٹرینین ہیومن رائٹس مانیٹر نے کہاہےکہ رفح میں ملبے تلے۔ گلیوں اور کھیتوں میں سینکڑوں لاشیں دبی ہوئی ہیں۔ اسرائیل کے زمین کی صفائی مہم میں باقیات ضائع ہونے کا شدید خدشہ ہے۔ یورومیڈیٹرینین نے خبردار کیا کہ رفح میں نام نہاد سبز شہر کی ازسرنو تشکیل کے زیر گردش منصوبے درحقیقت آبادی کو الگ تھلگ کرنے اور فوجی کنٹرول کے لیے استعمال ہوں گے، جس سے مقامی باشندوں کی اپنے اصل گھروں سے مستقل بے دخلی، ان کی بقا کے بنیادی وسائل پر ضرب اور مہلک طرزِ زندگی مسلط کیے جانے کا خطرہ ہے۔ یورو میڈیٹرینین نے کہا کہ بھاری مشینری کے ذریعے ملبہ ہٹانے اور زمین برابر کرنے سے لاشوں کی باقیات ملبے میں گڈمڈ ہو سکتی ہیں اور اسے کوڑے کے ڈھیر پر ڈالنے سے لاشوں کا سراغ ہمیشہ کے لیے ختم ہو جائے گا۔ یورومیڈیٹرینین ہیومن رائٹس مانیٹر نے بااثر ممالک اور فریقین سے مطالبہ کیا کہ وہ بین الاقوامی قانون کے تحت اپنی ذمہ داریاں پوری کریں، محض تشویش کے بیانات سے آگے بڑھ کر عملی دباؤ کے اقدامات کریں تاکہ فلسطینیوں کے خلاف اسرائیلی جرائم روکے جا سکیں۔