Raza Musani 
اسکردو: شہید ولی امر مسلمین سید علی خامنہ ای کا چہلم اسکردو میں عقیدت و احترام اور جوش و جذبے کے ساتھ منایا گیا۔ یہ اجتماع انجمن امامیہ بلتستان کے زیرِ اہتمام میونسپل اسٹیڈیم اسکردو میں منعقد کیا گیا، جہاں بلتستان کے چاروں اضلاع سے مختلف شعبہ ہائے زندگی سے تعلق رکھنے والی اہم شخصیات اور مختلف مکاتبِ فکر کے جید علماء کرام نے شرکت کی.
چہلم کے تاریخی اجتماع میں ڈیڑھ لاکھ سے زائد لوگ شریک ہوئے اور ولی امر مسلمین کو خراج عقیدت پیش کرنے کے ساتھ نئے رہبر معظم سے تجدید عہد کیا۔ گلگت بلتستان بھر سے لوگ قافلوں کی شکل میں چہلم کے اجتماع میں شریک ہوئے۔ مختلف مکاتبِ فکر کے نمائندہ علماء نے خطاب کرتے ہوئے شہداء کی عظیم قربانیوں کو زبردست خراجِ تحسین پیش کیا اور امتِ مسلمہ کے اتحاد و یکجہتی پر زور دیا۔ اجتماع سے قائد گلگت بلتستان سید راحت حسین الحسینی نے اپنے خطاب میں شہید رہبر معظم کو خراج عقیدت پیش کرنے کے ساتھ ساتھ ایران کی عظیم قوم کو ان کی تاریخی استقامت پر انہیں خراج تحسین پیش کیا۔ آغا راحت حسین نے گلگت اور اسکردو کے حالیہ افسوسناک سانحے پر صبر و تحمل کا مظاہرہ کرنے اور معاملے کو خوش اسلوبی سے حل کرنے پر وزیر اعلیٰ، چیف سیکرٹری، وزیر داخلہ اور قانون نافذ کرنے والے اداروں کا شکریہ ادا کیا۔ جبکہ صدر انجمن امامیہ بلتستان آغا سید باقر الحسینی نے شرکاء، دور دراز سے تشریف لانے والے علماء و زعماء، ضلعی انتظامیہ اور پاک فوج کا شکریہ ادا کیا۔ شرکاء نے پورے اجتماع کے دوران صبر و استقامت کا مظاہرہ کیا اور مختلف مواقع پر نعرۂ تکبیر، نعرۂ رسالت، نعرۂ حیدری اور حق کا سیدھا راستہ، کربلا کربلا جیسے فلک شگاف نعروں کے ذریعے مقررین کو داد دیتے رہے۔
