فلسطینیوں کی فتح اور کامیابی تک ان کے ساتھ ہیں(سید حسن نصراللہ)

امریکا ہمیں اقتصادی مسائل میں مبتلا کرکے مسئلہ فلسطین سے غافل نہیں کرسکتا ،ہم کامیابی تک فلسطینیوں کے ساتھ ہیں،الحاقی منصوبہ کو ہر صورت روکیں گے
 مسائل کے حل میں امریکا بڑی رکاوٹ ہے، ہم خطرات کو فرصت میں بدلنے کی توانائی رکھتے ہیں، حزب اللہ کسی استعماری طاقت کے سامنے سرنہیں جھکائے گی
بیروت (نیوز ڈیسک) حزب اللہ کے سیکریٹری جنرل سید حسن نصرااللہ نے امریکی حکام کو مخاطب کرتے ہوئے کہا ہے کہ اپنا وقت برباد نہ کرو، حزب اللہ کسی استعماری طاقت کے سامنے سرنہیں جھکائے گی، اسرائیل کے الحاقی منصوبے کو روکنے کیلئے کچھ بھی کرنے کو تیار ہیں، تکفیریت اور دہشت گردی امریکی پیداوار ہیں،جنگ تموز کی سالگرہ پر ویڈیو لنک کے ذریعے خطاب میں حسن نصراللہ نے کہا کہ حزب اللہ نے 33 روزہ جنگ میں امریکا کو بدترین شکست سے دوچار کیا، ہم خطرات کو فرصت میں تبدیل کرنے کی طاقت و توانائی رکھتے ہیں،انہوں نے لبنان کے اقتصادی مسائل و مشکلات اور بحران کو حل کرنے کی راہ میں امریکا کو سب سے بڑی رکاوٹ قرارد یا اور کہا کہ ہمیں بھی امریکی منصوبوں کو ناکام بنانے اور ملک کو درپیش اقتصادی اور معاشی مشکلات کو حل کرنے کے سلسلے میں باہمی تعاون سے کام لینا چاہیے اور ایسے ممالک کی طرف بڑھنا چاہیے جن کے دروازے لبنانی عوام کے لئے کھلے ہیں، سید حسن نصر اللہ نے ایران کی اقتصادی پالیسی کو بے مثال اور نمونہ قرار دیتے ہوئے کہا کہ اس قسم کی پالیسی اس بات کا باعث بنی کہ ایران گزشتہ 40 برسوں سے امریکا اور اس کے اتحادی ممالک کی غیر قانونی پابندیوں کا مقابلہ کرے، حسن نصر اللہ نے فلسطین کی بھر پور حمایت کا اعادہ کرتے ہوئے کہا کہ امریکا ہمیں اقتصادی مسائل میں مبتلا کرکے مسئلہ فلسطین سے غافل نہیں کرسکتا ہم فلسطینیوں کی فتح اور کامیابی تک ان کے ساتھ ہیں