منتخب حکومت گراکر پاکستان میں امریکا مخالف جذبات کم کیا یا بڑھاوا دیا ہے؟ عمران خان کابائیڈن سے سوال

اسلام آباد : عمران خان نے بائیڈن انتظامیہ سے سوال کیا ہےکہ پاکستان میں سازش کے ذریعے منتخب وزیراعظم کو ہٹا کر کٹھ پتلی وزیراعظم مسلط کرکے آپ نے پاکستان میں امریکا مخالف جذبات کو کم کیا یا بڑھاوا دیا ہے؟ سماجی رابطے کی ویب سائٹ پر عمران خان نے امریکی ٹی وی چینل فوکس نیوز کا ایک ویڈیو کلپ شیئر کیا جس میں امریکی دفاعی خاتون تجزیہ کار پاکستان کے حوالے سے اپنے خیالات پیش کررہی ہیں جس پر عمران خان کا کہنا تھا کہ اگر کسی کو بھی حکومت کی تبدیلی میں امریکی سازش پر کوئی شبہ ہے تو ویڈیو سے اس کے تمام شبہات دور ہوجانے چاہئیں کہ کیوں ایک منتخب وزیراعظم اور اس کی حکومت کو ہٹایا گیا، واضح طور پر امریکا چاہتا ہےکہ پاکستان میں ایک کٹھ پتلی اور اس کا فرمانبردار وزیراعظم ہو جو یورپ کی جنگ میں پاکستان کو غیر جانبدار رہنے کا انتخاب نہیں کرنے دے گا۔ عمران خان کا کہنا تھا کہ ایسا وزیراعظم جو امریکا کا فرمانبردار ہو وہ روس کے ساتھ معاہدے نہیں کرے گا اور چین سے ہمارے تزویراتی تعلقات میں بھی کمی لائے گا، لیکن اگر کوئی وزیر اعظم پاکستان کی خودمختاری اور آزاد خارجہ پالیسی کی بات کرے گا تو اسے ہٹا دیا جائےگا اور شہباز شریف جیسا فرمانبردار وزیر اعظم لایا جائے گا۔ عمران خان نے ایک بار پھر چیف جسٹس پاکستان سے مطالبہ کیا کہ وہ حکومت کی تبدیلی کی اس امریکی سازش ʼجو کہ ہمارے سفیرکو بھیجےگئے خفیہ مراسلے سے واضح تھی کی تصدیق ہونے کے بعد اس کی تحقیقات اور سازش میں شامل عناصر کی نشاندہی کے لیے کمیشن بنائیں اور اس کے لیے کھلی سماعت کا اہتمام کریں۔