تمام ادارے ٹیکنوکریٹ اتھارٹی کے حوالے کردیں گے، حماس

غزہ : حماس کے ترجمان حازم قاسم نے کہاہےکہ آزاد فلسطینی ٹیکنوکریٹ اتھارٹی قائم ہوتے ہی غزہ کے تمام شعبوں اور اداروں کو اس کے حوالے کردیا جائے گا۔ حازم قاسم نے کہا کہ تمام سرکاری اداروں اور متعلقہ شعبوں کو واضح ہدایات دی ہیں کہ وہ تمام امور اس اتھارٹی کے سپرد کرنے کی تیاری مکمل کریں۔ تاکہ اس کا کام کامیابی سے آگے بڑھ سکے یہ فیصلہ حماس کے لیے واضح اور حتمی ہے۔ حماس ترجمان نے کہا کہ یہ اقدام اعلیٰ ترین قومی فلسطینی مفاد کے تحت کیا جا رہا ہے اور اس منصوبے پر عمل درآمد کا حصہ ہے جس کے نتیجے میں غزہ پر جاری جنگ رکی جو شرم الشیخ میں طے پانے والے معاہدے کے تحت ممکن ہوئی۔ انہوں نے وضاحت کی کہ یہ قدم فلسطینی عوام کے زخموں پر مرہم رکھنے اور قابض اسرائیل کی مسلط کردہ تباہی ،سفاکیت اور نسل کشی کے بعد غزہ کی بحالی کی راہ ہموار کرنے کے لیے اٹھایا گیا۔