Raza Musani 
غزہ :فلسطینی مزاحمت کاروں نے ایک بار پھر صیہونی سائبر صلاحیتوں کے بلبلے کو پنکچر کردیا۔
قابض اسرائیلی فوج نے گیمنگ ایپلی کیشنز کے ذریعے درجنوں فوجیوں کے اسمارٹ فونز کو ہیک کرنے میں اسلامی تحریک مزاحمت حماس کے سائبرہیکنگ یونٹ کی کامیابی کا اعتراف کیا ہے۔ میڈیا رپورٹس کے مطابق حماس کے سائبر ہیکنگ یونٹ کے ارکان نے سوشل میڈیا کے ذریعے اسرائیلی لڑکیوں کے بھیس میں درجنوں اسرائیلی فوجیوں کے فون ہیک کیے اور پھر حماس کے تکنیکی ماہرین کی جانب سے تیار کردہ گیم ایپلی کیشن کا لنک بھیج دیا جو کہ اسمارٹ فونز کو کنٹرول کرتا ہے اور موبائل کے اندر موجود ڈیٹا تک رسائی کا ذریعہ بنتا ہے۔
اسرائیلی فوج نے ایک بیان میں کہا کہ غزہ میں مقیم گروپ نے اسرائیلی افواج سے متعلق معلومات اکٹھا کرنے کے طریقے تلاش کرنے کی کوششیں کیں،ان کے موبائل فونز میں اسپائی ویئر نصب کرنے اور جعلی پروفائلز کا استعمال کرتے ہوئے حکومتی فوجیوں کے ساتھ بات چیت شروع کرنے کی کوششیں شامل تھیں۔ انٹیلی جنس یونٹ کے ایک نامعلوم افسر نے بتایا کہ یہ پروفائلز سروس کے اہلکاروں کے ساتھ رابطے میں تھے تاکہ وہ کنکشن پیدا کر سکیں جو انہیں اگلا قدم اٹھانے اور گیم ایپلی کیشن کو ڈاؤن لوڈ کرنے کی طرف راغب کریں گے، جو کہ ایک بدنیتی پر مبنی حملے کا آلہ تھا۔
