مینڈیٹ واضح نہ ہونے سے امن فورس اب تک قائم نہیں ہوسکی، حماس

غزہ : حماس رہنما باسم نعیم نے کہاہے کہ مینڈیٹ اور دائرہ کار واضح نہ ہونے کی وجہ سے غزہ کیلئے امن فورس اب تک قائم نہیں ہوسکی۔ فلسطین اخبار سے گفتگو میں باسم نعیم نے کہا کہ جنگ بندی معاہدہ واضح طور پر ایک بین الاقوامی استحکام فورس کی تعیناتی کی اجازت دیتا ہے، جس کی اقوام متحدہ کی سلامتی کونسل بھی حمایت کر چکی ہے۔ تاہم ان کا کہنا تھا کہ فورس کی شناخت، کردار اور ذمہ داریوں پر کسی واضح اتفاق رائے کی عدم موجودگی کے باعث یہ عمل آگے نہیں بڑھ سکا۔ باسم نعیم نے واضح کیا کہ کسی بھی بین الاقوامی فورس کا کردار صرف جنگ بندی کی نگرانی، فریقین کو الگ رکھنے، کشیدگی روکنے اور رپورٹنگ تک محدود ہونا چاہیے اور اسے فلسطینی داخلی امور یا غزہ کی انتظامیہ میں کسی قسم کی مداخلت نہیں کرنی چاہیے۔