غزہ: رہائشی عمارت میں آتشزدگی، 21 افراد جاں بحق، متعدد زخمی

غزہ : غزہ کے جبالیہ پناہ گزین کیمپ میں رہائشی عمارت میں آگ لگنے سے 10 بچوں سمیت 21 افراد جاں بحق اور متعدد زخمی ہو گئے۔ رہائشی عمارت میں آگ اس وقت لگی جب سالگرہ کی تقریب کے دوران ایک موم بتی گیسولین کےڈرم پر جاگری۔ آگ نے دیکھتے ہی دیکھتے چار منزلہ عمارت کو اپنی لپیٹ میں لے لیا۔ ابتدائی رپورٹس میں کہا گیا ہے کہ اپارٹمنٹ کے اندر بڑی مقدار میں بینزین ذخیرہ کیا گیا تھا جس کی وجہ سے آگ تیزی سے پھیلی۔ متعدد جھلسے ہوئے افراد کو عمارت سے نکالا گیا، اور انہیں قریبی قصبے بیت لاہیا میں واقع پبلک اسپتال لے جایا گیا۔ افسوسناک واقعے کے بعد صدر محمود عباس نے ایک دن کے سوگ کا اعلان کیا ہے، اس دوران تمام سرکاری اداروں پر پرچم سرنگوں رہیں گے۔ انہوں نے واقعہ کو قومی تباہی قرار دیا۔