وزیر اعظم کے سابق معاون زلفی بخاری کی علامہ راجہ ناصر عباس سے ملاقات، تحفظات دور کرنے کی یقین دہانی

اسلام آباد : مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری کی پیپلزپارٹی کے شریک چیئرمین آصف علی زرداری کے ساتھ ملاقات سے حکومتی حلقوں میں بے چینی پھیل گئی۔ وزیر اعظم عمران خان کے سابق معاون خصوصی اور پی ٹی آئی رہنما زلفی بخاری علامہ راجہ ناصر عباس سے ملاقات کیلئے ان کی رہائش گاہ پہنچ گئے۔ملاقات میں دوطرفہ دلچسپی کے امور اور ملک کی موجودہ صورتحال پر تبادلہ خیال کیا گیا۔ ایم ڈبلیو ایم کے قائد نے دہشت گردوں سے مذاکرات، عزاداری پر غیر قانونی پابندیوں، عزاداران کے خلاف مقدمات، فرقہ وارنہ مسلکی نصاب تعلیم سمیت حکومت کی متعدد پالیسیوں پر اپنے تحفظات کا اظہار کیا اور انہیں آئین اور قومی سلامتی سے متصادم اور قومی مفادات کیخلاف قرار دیا۔زلفی بخاری نے وزیراعظم کی جانب سے پیغام پہنچایا اور تحفظات دور کرنے کی یقین دہانی کرائی۔ملاقات میں مرکزی ڈپٹی سیکریٹری جنرل سید ناصر شیرازی اور مرکزی سیکریٹری سیاسیات اسد نقوی بھی موجود تھے۔