Raza Musani 
جدہ : عرب سربراہ اجلاس نے مسئلہ فلسطین کی مرکزیت کا اعادہ اور عربوں کے اندرونی معاملات میں بیرونی مداخلت کو مسترد کردیا۔ سعودی عرب کی میزبانی میں جدہ میں 32 واں عرب سربراہ اجلاس اختتام پذیر ہو گیا۔ اجلاس میں مسئلہ فلسطین، سوڈان، یمن، لیبیا اور لبنان کی پیشرفت و دیگر موضوعات پر تبادلۂ خیال کیا گیا۔ شام کی بارہ سال بعد اجلاس میں شرکت پر شام کا بھرپور خیرمقدم کیا گیا اور امید ظاہر کی کہ اس اقدام سے شام کے استحکام اور اتحاد میں مدد ملے گی۔ ارکان نے کہاکہ شام کے بحران کے حل میں مدد کے لیے عرب کوششوں کو تیز کرنا چاہیے۔ اجلاس کے بعد جاری متفقہ اعلامیہ میں مسئلہ فلسطین کی مرکزیت کا اعادہ کیا گیا اور سوڈان کے حوالے سے غیر ملکی مداخلت کو مسترد کیا گیا اور متحارب فریقوں کے درمیان بات چیت اور اتحاد پر زور دیا گیا۔ اعلامیے میں عرب امن اقدام کو فعال کرنے کی اہمیت پر بھی زور دیا گیا، تنازع یمن کے حل کیلئے تمام بین الاقوامی اور علاقائی کوششوں کی حمایت کا اعادہ کیا گیا ہے جن کا مقصد بحران کے سیاسی حل تک پہنچنا ہے۔
