غزہ سے جبری بیدخلی نسلی تطہیر اور جرم ہے، او آئی سی

جدہ: اسلامی تعاون تنظیم نے غزہ سے فلسطینیوں کی جبری بے دخلی کو نسلی تطہیر۔ بین الاقوامی قانون کی سنگین خلاف ورزی اور انسانیت کے خلاف جرم قرار دیا ہے۔ او آئی سی کے سیکریٹری جنرل اسماعیل ولد شیخ احمد نے غزہ سے فلسطینیوں کی جبری بیدخلی سے متعلق اسرائیلی وزرا کے بیانات کی شدید مذمت کی ہے۔ اسماعیل ولد شیخ احمد نے کہا کہ غزہ کی پٹی مقبوضہ فلسطینی سرزمین کا اٹوٹ حصہ ہے اور فلسطینیوں کو ان کی سرزمین سے بے دخل کرنا نسلی تطہیر کے مترادف ہے۔ جس پر متعلقہ عالمی عدالتی اداروں کے سامنے احتساب ہونا چاہیے۔ انہوں نے عالمی برادری، بالخصوص سلامتی کونسل، سے مطالبہ کیا کہ مقبوضہ فلسطینی علاقوں کی آبادیاتی، جغرافیائی اور سیاسی صورتحال تبدیل کرنے کے اسرائیلی منصوبوں کے خلاف مؤثر اقدامات کیے جائیں۔