افغانستان میں سیلاب سے تباہی، امدادی سامان کا پاکستانی طیارہ کابل پہنچ گیا

کابل : پاکستان نے شدید بارشوں اور سیلاب سے متاثرہ افغانستان کے 12 صوبوں کے لیے ضروری ہنگامی امدادی سامان کے ساتھ سی ون تھرٹی طیارہ کابل بھیج دیا ہے۔ کابل میں پاکستانی سفیر منصور احمد خان نے بتایا کہ وزیراعظم شہباز شریف کی ہدایت پر پہلا سی ون تھرٹی طیارہ افغانستان پہنچا ہے۔ امدادی سامان میں حالیہ سیلاب سے متاثرہ افراد کے لیے خیموں، اشیائے خورونوش اور ادویات شامل تھیں۔آنے والے دنوں میں مزید امدادی سامان لے کر ایک اور طیارہ افغانستان روانہ کیے جانے کا امکان ہے۔ بارش اور سیلاب سے ملک کے مغربی صوبے بادغیس اور فاریاب اور شمالی صوبہ بغلان زیادہ متاثر ہوئے۔