باخموت میں شدید لڑائی، سینکڑوں افراد ہلاک و زخمی

کیف: باخموت کے محاذ پر روسی ویگنر گروپ اور یوکرینی فوج کے درمیان لڑائی میں شدت آگئی ہے۔اب تک سینکڑوں افراد ہلاک اور زخمی ہوچکے ہیں۔ یوکرین کے مشرقی ڈونباس خطے میں واقع باخموت شہر کا کنٹرول حاصل کرنے کے لیے شدید لڑائی ہورہی ہے۔ باخموت کا مغربی علاقہ ابھی تک یوکرینی فوج کے کنٹرول میں ہے تاہم وہ روسی گولہ باری سے تباہ ہوچکا ہے۔ جبکہ مشرقی علاقے پر روس کے ویگنر گروپ کا قبضہ ہے۔یوکرین کے صدر ولادیمیر زیلنسکی نے کہا کہ ایک ہفتے میں روس کے 1100 سے زائد فوجی ہلاک اور 15 سو زخمی ہوچکے ہیں جبکہ روس نے 24 گھنٹوں میں 220 سے زائد یوکرائنی فوجیوں کو ہلاک کرنے کا دعویٰ کیا ہے۔ مختلف میڈیا رپورٹ میں دعویٰ کیا گیا ہےکہ باخموت میں شدید لڑائی ہورہی ہے، لاشیں سڑکوں پر بکھری پڑی ہیں جبکہ شہری تہہ خانوں میں چھپے ہوئے ہیں۔ شہر بھوت نگری کا منظر پیش کررہا ہے۔ روس کی وزارت دفاع نے کہا کہ اس کی افواج مشرقی ڈونیٹسک کے علاقے میں مزید فوجی آپریشن کر رہی ہیں۔