روس پر پابندیوں میں نرمی سے یورپی سلامتی کو خطرہ لاحق ہے، یورپی کونسل

برسلز : یورپی رہنماؤں نے روسی تیل کی خریداری پر پابندیوں میں عارضی نرمی کے امریکی فیصلے پر تنقید کرتے ہوئے اسے یورپ کی سلامتی خطرے میں ڈالنے کے مترادف قرار دیا ہے۔ یورپی کونسل کے صدر انتونیو کوسٹا نے امریکی فیصلے کو انتہائی تشویشناک قرار دیتے ہوئے کہا کہ پابندیوں میں نرمی سے یوکرین کے خلاف جنگ لڑنے کے لیے روسی وسائل میں اضافہ ہو گا۔ یوکرین کے صدر زیلنسکی نے ایک نیوز کانفرنس میں کہا کہ اس اقدام سے روس کو دس ارب ڈالر کا فائدہ پہنچ سکتا ہے۔ اس سے امن میں مدد نہیں ملے گی۔
فرانسیسی صدر ایمانوئل میکخواں کا کہنا ہے کہ آبنائے ہرمز کی بندش کا اعلان کسی بھی صورت روس سے پابندیاں ہٹانے کا جواز نہیں بنتا۔ کینیڈین وزیر اعظم مارک کارنی نے نیوز کانفرنس میں کہا کہ کینیڈا کا موقف ہے کہ روس پر پابندیاں برقرار رہنی چاہئیں۔