Raza Musani 
ڈی پی آئی سیکنڈری ایجوکیشن اسکولز پنجاب نے صوبے بھر کے اسکولوں کیلئے اہم سکیورٹی ہدایات جاری کرتے ہوئے مارننگ اسمبلی تا حکمِ ثانی معطل کرنے کا اعلان کر دیا ہے۔ جاری کردہ مراسلے کے مطابق پنجاب بھر کے تمام سرکاری و نجی اسکولوں میں سکیورٹی انتظامات مزید سخت کرنے کی ہدایت کی گئی ہے۔ مراسلے میں کہا گیا ہے کہ تمام اسکولوں میں نصب سی سی ٹی وی کیمرے فوری طور پر فعال کیے جائیں اور ان کی مسلسل مانیٹرنگ یقینی بنائی جائے۔ حکام نے ہر استاد کیلئے اینڈرائیڈ موبائل فون پر پنجاب سیف سٹی ایپ ڈاؤن لوڈ کرنا لازمی قرار دے دیا ہے تاکہ کسی بھی ہنگامی صورتحال میں فوری اطلاع دی جا سکے۔
اسکولوں کے مین گیٹس اوقاتِ کار کے دوران بند رکھے جائیں اور غیر متعلقہ افراد کے داخلے پر سختی سے پابندی عائد ہو گی، مزید برآں تمام تعلیمی اداروں میں ایمرجنسی ڈرلز کروانے اور طلبہ و عملے کو ایگزٹ پوائنٹس سے مکمل آگاہی فراہم کرنے کا حکم دیا گیا ہے۔ ڈی پی آئی سیکنڈری ایجوکیشن کی جانب سے ہائی اسکول طلبہ کو کسی بھی قسم کے احتجاج میں شرکت سے روکنے کی بھی ہدایت کی گئی ہے۔ مراسلے میں کہا گیا ہے کہ ان احکامات پر عملدرآمد کی روزانہ کی بنیاد پر رپورٹس بمعہ تصاویر متعلقہ حکام کو ارسال کی جائیں گی تاکہ سکیورٹی صورتحال کا مسلسل جائزہ لیا جا سکے۔
