Raza Musani 
غزہ: صیہونی فوج نے جبالیہ کو خالی کرنے کا حکم دینے کے چند گھنٹوں بعد ہی وحشیانہ بمباری شروع کردی۔ جنگی طیاروں نے جبالیہ کے مختلف مقامات پر لگاتار بم برسائے جس سے کئی مکانات تباہ ہوگئے یا انہیں نقصان پہنچا اور درجنوں افراد شہید اور زخمی ہوگئے جس میں بڑی تعداد خواتین اور بچوں کی ہے۔ رات بھر رفح۔ دیر البلاح۔ صابرہ پر بھی بمباری کا سلسلہ جاری رہا۔ جس کے نتیجے میں ایک ہی خاندان کے سات افراد سمیت 36 فلسطینی شہید اور کئی زخمی ہوگئے۔ شہدا میں پیڈیا ٹرک سرجن محمد نمز قزاط اور ان کے بیٹے بھی شامل ہیں۔
ادھر اسرائیل حکم کے بعد فلسطینی افراتفری کے عالم میں فرار ہورہے ہیں۔ فلسطینی پناہ گزینوں کے لیے اقوام متحدہ کی ایجنسی کے مطابق چار دن میں ڈیڑھ لاکھ فلسطینی نقل مکانی کرچکے ہیں جبکہ اسرائیلی فوج کا کہنا ہے کہ یہ تعداد تین لاکھ کے قریب ہے۔ اسرائیلی فوج نے شمالی غزہ کے علاقے جبالیہ کو خطرناک جنگی زون قرار دینے کے بعد وہاں سے بھی لوگوں مغربی علاقے کی طرف جانے کا حکم دیا ہے۔ گذشتہ روز صیہونی فوج نے مشرقی اور وسطی رفح کے مزید علاقوں کو خالی کرنے کا حکم دیا۔ القسام کی کارروائیوں میں ایک اور اسرائیلی فوجی ہلاک ہوگیا۔ دو دن میں مارے گئے فوجیوں کی تعداد چودہ ہوگئی ہے۔
