مصر میں ڈالر کا بحران، غیر ملکیوں کیلئے شہریت قوانین نرم

قاہرہ: مصر نے ڈالر کے بحران سے نمٹنے کیلئے غیر ملکیوں کیلئے شہریت کے قوانین نرم کردئے۔ سرکاری اخبار الاحرام کے مطابق وزیراعظم مصطفیٰ مدبعولی نے کہا ہے کہ غیر ملکی اب تین لاکھ ڈالر کی سرمایہ کاری پر شہریت حاصل کرسکیں گے پہلے یہ رقم پانچ لاکھ ڈالر تھی ۔ غیرملکی بینک اکاؤنٹ میں 5 لاکھ ڈالر جمع کروا کر یا سرکاری خزانے کے غیر ملکی ریونیو میں ناقابل واپسی ڈھائی لاکھ ڈالر کی رقم جمع کرواکر بھی شہریت لے سکیں گے۔ مصر میں اس وقت ڈالر کی شدید قلت ہے اور وہ بدترین مہنگائی سے نبرد آزما ہے۔ قاہرہ کے زر مبادلہ ذخائر 34.35 ارب ڈالر ہیں جس میں سے 28 ارب ڈالر امیر خلیجی ممالک کی طرف سے ڈپازٹ کروائے گئے ہیں۔ یہ خلیجی ممالک مصر کے کئی سرکاری اثاثے خریدنا چاہتے تھے لیکن وہ معاملات اس لیے طے نہیں پائے کیونکہ کرنسی مستقل روبہ زوال ہے۔ ایک سال میں مصری پاؤنڈ کی قدر آدھی رہ گئی ہے، مہنگائی کی شرح 26.5 ہوچکی ہے۔